Veteranas poetas da india e da montaña luguesa poñen o ramo a poetas Di(n)versos

Helena Villar Janeiro.

Helena Villar Janeiro.

Hai algúns días coñeciamos a nova da cancelación, por parte da americana Louise Glück, da súa viaxe a España con paradas en Granada e A Coruña. Iso fai da próxima cita de POETAS DI(N)VERSOS a última da edición en curso. Terá lugar no presente mes de xuño, como foi habitual nas últimas seis edicións do ciclo de recitais poéticos; coma sempre en luns, o día 8 ás 20:30h, no Auditorio do Ágora da Coruña.

O encontro reunirá dúas autoras veteranas en cadansúa lingua literaria: o hindi e o galego. As recoñecidas poetas Rati Saxena e Helena Villar Janeiro lerán obra propia nos seus idiomas orixinais, aínda que seguida de traducións ao galego no caso da visitante. Soarán na voz da responsable das mesmas, a poeta e dinamizadora cultural Yolanda Castaño, directora de POETAS DI(N)VERSOS, quen tamén conducirá –como cada mes– o acto. Ao remate do recital, de aproximadamente unha hora, o público asistente poderá aproveitar para adquirir algunha das obras das convidadas e levar unha sinatura nos seus exemplares. Pinceladas de música e plástica adobiarán unha sesión lírica e emocional capaz de cativar a propios e estraños.

Rati Saxena.

Rati Saxena.

A programación poética do Concello da Coruña, único ciclo periódico e regular con poetas internacionais en toda España, agarda poder renovar as súas citas mensuais o vindeiro curso, logo do habitual parón estival. Ata o de agora, máis de oitenta poetas das máis diversas nacionalidades, incluídos Premios Pulitzer, Nacionais de Poesía e candidatos ao Nobel, pasaron ante o nutrido público dun ciclo que acadou o Premio da Crítica Galicia á mellor Iniciativa Cultural.

 

Helena Villar Janeiro naceu en Becerreá (Lugo), foi profesora de ensino primario e secundario e, hoxe retirada, vive entre Compostela e Rianxo. Foi presidenta da Fundación Rosalía de Castro e membro do plenario do Consello da Cultura Galega. Comezou na poesía facendo parte do colectivo Cravo Fondo (1977), e deu ao prelo multitude de títulos tanto en poesía como en prosa, ensaio divulgativo e literatura infanto-xuvenil, algún deles asinados a catro mans co seu home, Xesús Rábade Paredes. É unha habitual colaboradora en prensa e recibiu galardóns coma o Xacobeo ou o Eusebio Lorenzo Baleirón. Pola súa banda, Rati Saxena naceu no Rajhastán (norte da India), e reside hoxe no estado de Kerala, no sur. É poeta, tradutora, editora, promotora cultural e estudosa dos Vedas (textos sagrados da literatura clásica escrita en sánscrito). Autora de once poemarios en hindi e inglés, os seus traballos teñen sido galardoados polo Centro Nacional das Artes Indira Ghandi ou pola Kendriya Sahitya Akademi. Fóra da India, impartiu conferencias en universidades americanas e fixo parte de festivais de poesía en países como Italia, Noruega, Macedonia, Austria, Colombia, Irán ou China.

 

Print Friendly, PDF & Email
Me gusta
Me gusta Me encanta Me divierte Me asombra Me entristece Me enfada