Permitirá mellorar as infraestruturas e os servizos dos 122 peiraos

O Consello da Xunta remite ao Parlamento o proxecto da 1ª Lei de portos autonómica

Busca axilizar os trámites nas concesións para darlle maiores garantías aos inversores

baionaO presidente da Xunta, Alberto Núñez Feijóo, destacou hoxe a aprobación definitiva no Consello da Xunta do proxecto da primeira Lei de Portos de Galicia, un texto que se remite ao Parlamento para que comece a súa tramitación e que permitirá mellorar as infraestruturas e os servizos dos 122 peiraos dependentes da Administración galega.

Durante a rolda de prensa do Consello, Feijóo destacou que este documento permitirá adaptar a lei estatal ás diversas particularidades dos portos de competencia da Xunta, e que non ten en conta a lexislación nacional actual, así como prepararnos ante os retos que están a experimentar os portos, como a progresiva apertura dos portos a distintos investidores.

Nun primeiro termo, o responsable do Goberno galego salientou a vontade de consenso coa que nace esta normativa, co obxectivo de que sexa o máis representativa posible. Así, este texto contén achegas recollidas nunha xornada de posta en común sobre as directrices que deben rexer esta futura normativa, á que asistiron máis dun centenar de representantes da comunidade portuaria -do sector profesional, do empresarial e comercial e da náutica recreativa-.

Ademais, Portos de Galicia informou sobre o transcurso de elaboración deste texto a Costas do Estado, Portos do Estado, ao Instituto de Estudos do Territorio e a Fegamp, entre outros órganos.

Entre outros obxectivos, o proxecto de lei busca axilizar os trámites nas concesións para darlle maiores garantías aos inversores e así dar un papel decisivo á participación dos emprendedores na actividade portuaria do presente e o futuro. Con este obxectivo, simplifícase o acceso para a prestación de servizos públicos a través das concesións, coa previsión de que o procedemento pase dos 4 meses actuais a 30 días

simplifícase o acceso para a prestación de servizos públicos a través das concesións, coa previsión de que o procedemento pase dos 4 meses actuais a 30 días

.

Nesta mesma liña, o documento contempla tamén a ampliación do prazo das concesións, que pasarán de 30 a 50 anos. A nova normativa afonda ademais na transparencia no procedemento de concesión de servizos públicos portuarios, ao recuperar o trámite de competencia de proxectos de solicitudes de concesións.

A futura lei tamén axilizará a retirada de buques abandonados e a de vehículos e outros obxectos en terreo portuario. Ao respecto, considerará buques abandonados a aqueles que permanezan durante máis de seis meses atracados, amarrados, ancorados ou depositados en seco no mesmo lugar dentro do porto, sen actividade apreciable, e sen ter aboado as taxas correspondentes. E, no caso de vehículos, maquinaria e obxectos en xeral, Portos de Galicia tamén poderá declaralos en situación de abandono sempre que permanezan no ámbito do dominio público portuario por un período superior a un mes, no mesmo lugar e presenten condicións que permitan presumir racionalmente a situación de abandono.

Sobre á axilización dos prazos de autorizacións de atraque, Feijóo subliñou que o novo documento abrirá un prazo de presentación de solicitudes que non será superior a 15 días hábiles. Así mesmo, trala adxudicación, no caso de que non foran suficientes as prazas, haberá unha lista de espera para cada un dos portos e instalacións de titularidade autonómica.

O texto prevé ademais a figura de plans directores de infraestruturas dos portos para planificar a dotación de proxectos de obras e de instalacións durante un horizonte temporal dun mínimo de 5 anos. Con estes documentos analizaranse as situacións actuais dos portos, estrutura do tráfico e das actividades portuarias e as súas necesidades de desenvolvemento, entre outras cuestións.

En relación á creación dos plans especiais que recollen o sistema de cada porto e as actividades que se poden desenvolver nel, Feijóo subliñou que estes incluirán as medidas e previsións necesarias para garantir unha eficiente explotación do espazo portuario e a súa conexión cos sistemas xerais de transporte terrestre.

Logo de subliñar que se reforzará tamén a figura do gardapeiraos ao atribuírlle carácter de axente de autoridade, o presidente da Xunta salientou que, en materia de prevención e loita contra a contaminación, o proxecto de lei recollerá a prohibición no dominio público portuario de calquera tipo de vertido contaminante, sólido, líquido ou gasoso e a obriga de que os responsables dos vertidos procedan á plena rexeneración das augas.

“En definitiva, estamos a falar dunha lei que busca axilizar o funcionamento da administración portuaria de Galicia, axilizar os trámites aos investidores que decidan participar na actividade portuaria de Galicia”, concluíu.

Print Friendly
Me gusta
Me gusta Me encanta Me divierte Me asombra Me entristece Me enfada