A Real Filharmonía de Galicia, coa voz da mezzosoprano catalá Marta Infante, ofrece un concerto no Festival de Músicas Contemplativas

A mezzosoprano catalá Marta Infante.

A mezzosoprano catalá Marta Infante.

A Real Filharmonía de Galicia celebra este mércores, 1 de abril, un concerto no marco do IX Festival de Músicas Contemplativas. Terá lugar na igrexa do compostelán Convento do Carme, ás 21:00 horas, baixo a batuta do mestre Maximino Zumalave.

 

A orquestra tocará dúas cantatas escritas por Johann Sebastian Bach (1685-1750) en 1726, a Cantata nº 170 e a Cantata nº 35. Na actualidade consérvanse 200 cantatas das aproximadamente 300 compostas por Bach, na súa maioría escritas durante os 27 anos nos que o compositor ocupou o posto de cantor na igrexa de Santo Tomás de Leipzig. Entre as súas obrigas figuraba a organización dos programas de música relixiosa para as igrexas da cidade e a presentación dunha nova cantata cada festividade e cada domingo. En só sete das súas cantatas relixiosas prescinde do coro a catro voces tan característico e recorre a un solista vocal, como é o caso destas dúas que interpretará a RFG.

 

A Cantata nº 170 estaba destinada ao sexto domingo despois de Trindade. Evoca a pasaxe evanxélica do Sermón da Montaña; expresa o desexo de morte e refire o tema da xustiza, da oposición dos cristiáns á hipocrisía dos fariseos. Pola súa parte, a Cantata nº 35 corresponde ao duodécimo domingo despois da Trindade.

 

Os músicos acompañarán á voz da mezzosoprano catalá Marta Infante nestas dúas obras. Estudou canto, piano e viola no conservatorio da súa cidade (Lleida), trasladándose máis tarde á República Checa para realizar estudos superiores de canto na Universidade de Ostrava. No ámbito da música antiga actuou en numerosos festivais de todo o mundo, mesmo en países como Xapón, Exipto, Siria, Xordania ou Líbano. Un dos seus discos foi galardoado en Holanda como un dos mellores dez discos de música antiga de 2010.

 

A música dolorosa de Vasks

 

Os músicos interpretarán ademais Música dolorosa de Peteris Vasks (1946), que nos anos noventa se converteu no compositor letón máis recoñecido en todo o mundo. Cun estilo ecléctico, as súas obras transmiten horror, esperanza e consolo. Próxima ao chamado minimalismo místico pódese situar a Música dolorosa, composta en 1983 con motivo do falecemento da irmá do compositor. Nela aternan seccións de serenidade e resignación con outras de rabia, aínda que Vasks non se deixa invadir pola desesperación.

 

Print Friendly
Me gusta
Me gusta Me encanta Me divierte Me asombra Me entristece Me enfada

Etiquetas: