A Xunta garante a redacción do proxecto da Variante de Ponteareas cando o Ministerio de Fomento asine o convenio e se comprometa coa execución das obras

A conselleira de Infraestruturas lembra que o Ministerio de Fomento e o Concello teñen desde verán a proposta de convenio remitida pola Xunta, en consonancia co protocolo asinado polas tres administracións.

A Xunta de Galicia garante que licitará a redacción do proxecto da Variante de Ponteareas cando o Ministerio de Fomento asine o convenio polo que se compromete á execución das obras. Así o trasladou hoxe a conselleira de Infraestruturas e Mobilidade, Ethel Vázquez Mourelle, aos representantes da plataforma de veciños pola Variante de Ponteareas, cos que mantivo un encontro nas dependencias da Xunta en Pontevedra, acompañada do delegado territorial, José Manuel Cores Tourís.

A conselleira de Infraestruturas e Mobilidade lembrou que a Xunta, o Concello de Ponteareas e o Ministerio de Fomento asinaron en 2015 un protocolo de colaboración para o impulso conxunto desta infraestrutura, asumindo o Goberno galego a redacción do proxecto, o Executivo central a execución e o financiamento das obras e o municipio a titularidade da nova vía.

Co obxectivo de promover avances no desenvolvemento deste acordo, a Consellería de Infraestruturas defendeu a necesidade de asinar un convenio de colaboración para blindar o compromiso de cada administración coa Variante de Ponteareas, algo que o anterior Goberno de España reflectiu incorporando unha partida específica para estas obras nos Orzamentos xerais do Estado de 2018.

A propia Xunta elaborou unha proposta de convenio de colaboración, que foi entregada ao Concello de Ponteareas o pasado mes de agosto e remitida ao Ministerio de Fomento en setembro. Polo momento, nin o Goberno local nin a Administración central se pronunciaron sobre o mesmo.

A conselleira de Infraestruturas lembrou que a Variante de Ponteareas é unha infraestrutura de novo trazado que vai conectar dúas vías de titularidade estatal, a A-52 a N-120, polo que é necesario contar co visto e prace e compromiso con esta estrada dos actuais responsables do Ministerio de Fomento.

Ethel Vázquez salientou que resulta imprescindible contar con esas garantías de execución das obras antes de que o Goberno autonómico contrate a redacción do proxecto.

Print Friendly, PDF & Email
Me gusta
Me gusta Me encanta Me divierte Me asombra Me entristece Me enfada